சேத்தன், ஸ்ரீ கிருஷ்ண தயாள், அம்மு அபிராமி, வசந்த் மாரிமுத்து, மணிமேகலை உட்பட பலர் நடித்துள்ளனர்.

கூத்து வாத்தியார் தாண்டவம் (சேத்தன்) தலைமையிலான ‘அம்பலவாணன் நாடக சபை’யில் (ஜமா) பெண் வேடமிட்டு நடித்து வருகிறார் கல்யாணம் (பாரி இளவழகன்). எப்போதும் திரௌபதி வேடமே அவருக்குத் தரப்படுகிறது. பெண் வேடமிட்டு நடிப்பதால் தன் மகனுக்கு திருமணம் ஆகவில்லை என வேதனைப்படுகிறார் கல்யாணத்தின் தாய். இதனால், பெண் வேடம் அணியாமல் அர்ஜுனன் வேடத்தில் நடிக்குமாறு அவருடைய தாய் கூறுகிறார்.

கூத்து மீது தான் கொண்ட காதலுக்காகப் பல இடங்களில், குறிப்பாக வாத்தியார் தாண்டவத்திடம் அவமானப்படும் கல்யாணம், இறுதியில் அர்ஜுனன் வேடமிட்டாரா என்பதுதான் ‘ஜமா’. தெருக்கூத்து கலைஞரான தன் தந்தையின் பாரம்பரியத்தை மீட்டெடுக்க தானே ஒரு ‘ஜமா’ அமைக்க போராடுகிறார் கதாநாயகன். இடையே, தாண்டவத்தின் மகள் ஜெகாவுடனான (அம்மு அபிராமி) காதல் என்னவானது என்பதும் கதையில் பேசப்பட்டுள்ளது.

இந்தத் திரைப்படம் குறித்து பல்வேறு ஊடகங்களில் வெளியான விமர்சனங்களை இங்கே தொகுத்து வழங்குகிறோம்.

அறிமுக நடிகரின் தேர்ந்த நடிப்பு

“கதாநாயகனாக அறிமுகமாகியுள்ள பாரி இளவழகன் அற்புதமாக நடித்திருக்கிறார். பெண் வேடமிட்டே பழகிய ஒருவரின் உடல் நளினங்களிலும் பெண் குடியேறியிருப்பதை தன் நடிப்பின் மூலம் அபாரமாக வெளிப்படுத்துகிறார்,” என பாராட்டியிருக்கிறது ‘தினமணி’ நாளிதழ்.

“வேட்டியை ஒரு கையில் பிடித்துக்கொண்டு பெண்ணைப்போலவே மலை உச்சிக்கு செல்லும் காட்சியிலும் காதலி முத்தம் கொடுக்கும்போது பெண்ணைப்போன்றே தயங்குவதும் சிணுங்குவதுமாக தேர்ந்த நடிகனைப்போல் கதாபாத்திரத்திற்கு உயிரூட்டியிருக்கிறார்,” என பாராட்டியுள்ளது தினமணி.

விடுதலை திரைபடத்துக்குப் பின் பெயர் சொல்லும் படமாக இருக்கும் என நடிகர் சேத்தனையும் இவர்களையெல்லாம் ஏப்பம் விடும் நடிப்பைக் கொடுத்திருப்பதாக நடிகர் ஸ்ரீ கிருஷ்ண தயாளையும் பாராட்டியுள்ளது அந்நாளிதழ். குறிப்பாக, “ராஜபாட்டை வேஷமிடுவதிலும் குடித்துவிட்டு ஆத்திரமடைவதுமாக நடிப்பில் மிரட்டுகிறார்,” என சேத்தனின் நடிப்பு குறித்து புகழ்ந்துள்ளது.

“அன்பை வெளிப்படுத்துவதிலும் கோபத்தைக் காட்டுவதிலும் அவரது கண்கள்கூட தனித்துவமாக இருக்கிறது,” என அம்மு அபிராமியின் நடிப்பை குறிப்பிட்டு கூறியுள்ளது ‘தினமணி’.

தெருக்கூத்துக் கலைஞர்களின் வாழ்வியலை இயல்பாகப் பதிவு செய்திருப்பதாக இயக்குநரைப் பாராட்டியுள்ள அந்நாளிதழ், ஜமாவில் திரௌபதியாக வேடம்போடும் ஒரு ஆண் வழியாகக் கதையைக் கடத்தியிருப்பது நல்ல பார்வை என கூறியுள்ளது.

சில விமர்சனங்களையும் தினமணி முன்வைத்துள்ளது. “எழுத்தில் இன்னும் கவனமாக இருந்திருக்கலாம் என்றும் தோன்றுகிறது. அவ்வளவு எதார்த்தமான ஜமாவையும் கூத்துக்கலையையும் காட்டியவர்கள் படத்தில் பஃபூன் கதாபாத்திரத்திற்கு காட்சிகள் இல்லாமல் செய்திருப்பது சின்ன சறுக்கல்,” என குறைகளையும் சுட்டிக்காட்டியுள்ளது ‘தினமணி’.

நெகிழ வைத்த கிளைமாக்ஸ்

“நீண்ட கூந்தல், பெண்களுக்கே உரிய எளிய நடை மற்றும் பேச்சு மொழியுடன் பாரி இளவழகன் படத்தில் கல்யாணம் என்ற கதாபாத்திரமாகவே வாழ்ந்துள்ளார். உடல்மொழியைச் சிறப்பாக செய்து கைத்தட்டல் வாங்கி இருக்கிறார். குறிப்பாக கிளைமாக்ஸ் காட்சியில் நெகிழ வைத்து இருக்கிறார்,” என நடிகர் பாரி இளவழகனை பாராட்டியிருக்கிறது ‘மாலை மலர்’ நாளிதழ்.

பாரி இளவழகனைத் திருமணம் செய்து கொள்ள வலியுறுத்துவதிலும், காதலனுக்காகத் தந்தை சேத்தனை எதிர்ப்பதிலும் அம்மு அபிராமி கவனிக்க வைத்து இருக்கிறார் என்றும், பூனை குமார் கதாபாத்திரத்தில் வசந்த் மாரிமுத்து மற்றும் நாடக அனுபவமுள்ள நடிகர்கள் தங்களது யதார்த்த நடிப்பை வெளிப்படுத்தி உள்ளனர் என்றும் ‘மாலை மலர்’ நாளிதழ் இத்திரைப்படத்தை புகழ்ந்துள்ளது.

பிளாஷ்பேக் காட்சிகள் நீளம்

பாடல்கள், ஒப்பனை, கலையம்சம் என, அனைத்து தரப்பிலும் தெருக்கூத்து கலையின் நம்பகத்தன்மையை இப்படம் பிரதிபலிப்பதாக ‘சினிமா எக்ஸ்பிரஸ்’ இணையதளம் தெரிவித்துள்ளது.

சில இடங்களில் வசனங்கள் பொத்தம்பொதுவாக இருப்பதாகவும் அதனால் அவை எந்த உணர்ச்சியையும் தூண்டவில்லை என்றும் விமர்சித்துள்ளது.

கல்யாணம் மற்றும் ஜெகா (அம்மு அபிராமி) ஆகியோரின் காதல் காட்சிகள் மனதை நெகிழச் செய்வதாகவும் பெண்கள் தங்கள் காதலை முன்வந்து கூற முயற்சிப்பதை திரையில் பார்ப்பது அழகானது என குறிப்பிட்டுள்ளது அந்த விமர்சனம்.

திரைப்படத்திலிருந்து பார்வையாளர்கள் விலகிவிடும் சமயத்தில் படத்தை அடுத்தக்கட்டத்திற்கு நகர்த்த அந்த இடத்தில் யாராவது ஒருவர் இறக்க வேண்டும் என இயக்குநர்கள் நினைத்துக்கொள்வதாக விமர்சித்துள்ளது ‘சினிமா எக்ஸ்பிரஸ்’.

பிளாஷ்பேக் காட்சிகள் மிக நீளமாக இருப்பதாகவும் ‘சினிமா எக்ஸ்பிரஸ்’ தெரிவித்துள்ளது.

இரண்டாம் பாதியில் வேகத்தடை

மிக விரைவாக கதாபாத்திரங்களை அறிமுகப்படுத்தி கதைக்குள் நகர்வதாக ‘டைம்ஸ் ஆப் இந்தியா’ நாளிதழ் தெரிவித்துள்ளது.

கல்யாணம் மற்றும் தாண்டவத்தின் குணாதிசயங்களை அவர்களின் உடல்மொழி வாயிலாக காட்டுவதை குறிப்பிட்டுள்ளது அந்நாளிதழ். முதல் பாதி வேகமாக நகர்வதாகவும் ஆனால் இரண்டாம் பாதியில் அது குறைந்துவிடுவதாகவும் விமர்சித்துள்ளது. கல்யாணத்தின் கதாபாத்திரத்தில் சில முரண்பாடுகள் ஏற்படுவதாக அந்நாளிதழ் சுட்டிக்காட்டியுள்ளது. தன் காதலியை புறக்கணிப்பதும் தன் கதாபாத்திரத்திலிருந்து கல்யாணம் விலகிச் செல்வதை காட்டுவதாக தெரிவித்துள்ளது.

தொழில்நுட்ப ரீதியாக படம் சிறப்பாக இருப்பதாக பாராட்டவும் செய்துள்ளது டைம்ஸ் ஆப் இந்தியா. தெருக்கூத்தை விளக்கும் உடைகள், லைவ் சவுண்ட், நடிப்பு ஆகியவற்றையும் பாராட்டியிருக்கிறது. சேத்தன், பாரி இளவழகன், அம்மு அபிராமி, மணிமேகலை, ஸ்ரீ கிருஷ்ண தயாள் என நடிகர்களை தனித்தனியாக குறிப்பிட்டு அவர்களின் நடிப்பை பாராட்டியுள்ளது.

துணை நடிகர்கள் பலரும் உண்மையாகவே தெருக்கூத்து கலைஞர்கள் என்பதால் அவர்களின் சிறப்பான பங்களிப்பை அளித்திருப்பதாக தெரிவித்திருக்கிறது டைம்ஸ் ஆப் இந்தியா. இளையராஜாவின் இசை படத்திற்கு வலு சேர்த்திருப்பதாகவும் சில குறைகளுக்கு மத்தியிலும் அழிந்துவரும் தெருக்கூத்து கலைக்கு சிறப்பான மரியாதையை இப்படம் செய்திருப்பதாக குறிப்பிட்டிருக்கிறது.

இலங்கை கிரிக்கெட் அணியின் முன்னாள் சுழற்பந்து வீச்சாளர் முத்தையா முரளிதரனின் வாழ்க்கை வரலாற்றைத் தழுவி எடுக்கப்பட்டுள்ள ‘800’ என்ற திரைப்படம் இன்று திரையரங்கில் வெளியாகியுள்ளது. தமிழ் திரையுலகைச் சேர்ந்த தொழில்நுட்ப கலைஞர்கள் பலர் இந்தப் படத்தில் பணியாற்றி உள்ளனர்.

இந்தப் படத்தின் பெரும்பகுதி இலங்கையில் படமாக்கப்பட்டுள்ள நிலையில் ஒரு சில சர்ச்சைகளுக்குப் பிறகு இன்று வெளியாகியுள்ளது.

படத்தின் கதை சுருக்கம்

இந்தியாவிலிருந்து, இலங்கையில் உள்ள தேயிலை தோட்டங்களில் வேலை செய்ய பலரும் குடிபெயர்ந்து சென்றனர். அப்படி இலங்கைக்குச் சென்ற குடும்பங்களில் முத்தையா முரளிதரனின் குடும்பமும் ஒன்று.

தமிழ் பாரம்பரியத்தைப் பின்புலமாகக் கொண்டு இலங்கையில் வளரும் முத்தையா முரளிதரனுக்கு சிறுவயதில் இருந்தே கிரிக்கெட் மீது ஆர்வம் அதிகம். அவரது ஆதீத ஆர்வத்தின் காரணமாக இலங்கை கிரிக்கெட் அணியில் சேர முயற்சி செய்யும்போது சந்தித்த சிக்கல்களையும், சர்வதேச கிரிக்கெட் அரங்கில் அறிமுகம் ஆன பிறகு பந்துவீச்சாளராக எதிர்கொண்ட சிக்கலான தருணங்களையும் எப்படி கடந்து வந்தார் என்பதை ‘800’ திரைப்படத்தின் மூலமாக காட்சிப்படுத்தியுள்ளனர்.

இலங்கைத் தமிழரான முத்தையா முரளிதரனுக்கு கிரிக்கெட் அணியிலும், இலங்கையின் அரசியல் களத்திலும் எழுந்த பிரச்னைகளைக் கடந்து சர்வதேச கிரிக்கெட்டில் எப்படி 800 விக்கெட்டுகளை வீழ்த்தி சிறந்த சுழற்பந்துவீச்சாளராக மாறினார் என்பதே இந்தப் படத்தின் கதை.

‘800’ படத்தில் முத்தையா முரளிதரன் கதாபாத்திரத்தில் மதுர் மிட்டல் நடித்துள்ளார். இதற்கு முன்பு, ஆஸ்கர் விருது பெற்ற ‘ஸ்லம் டாக் மில்லினர்’ திரைப்படத்தில் சிறுவனாக இவர் நடிந்த்துள்ளார். மேலும் ஒரு சில இந்தி படங்களில், இந்தி தொலைக் காட்சியில் ஒளிப்பரப்பான நாடகங்களில் இவர் நடித்துள்ளார்.

முதலில் ஹீரோ கதாபாத்திரத்தில் நடிக்க விஜய் சேதுபதி ஒப்பந்தம் செய்யப்பட்டு, படத்தின் ஃபர்ஸ்ட் லுக் காட்சி வெளியிடப்பட்டது. ஆனால் விஜய் சேதுபதி இந்த கதாபாத்திரத்தில் நடிக்கக் கூடாது என எழுந்த எதிர்ப்பைத் தொடர்ந்து அவர் படத்திலிருந்து விலகினார்.

இந்த படத்தில் கதாநாயகியாக மகிமா நம்பியார் நடித்துள்ளார். நாசர், நரேன் உள்ளிட்ட தமிழ் நடிகர்கள் முக்கிய கதாபாத்திரங்களில் நடித்துள்ளனர்.

படத்திற்கு ஜிப்ரான் இசையமைத்துள்ளார். இந்த படத்தை இயக்குநர் ஸ்ரீபதி இயக்கியுள்ளார்.

முரளிதரனை துரத்திய கேள்வி

முத்தைய முரளிதரனின் வாழ்க்கை முழுவதும் அவரை இரண்டு கேள்விகள் துரத்தின. “மைதானத்திற்கு வெளியே, நீ தமிழனா அல்லது இலங்கையைச் சேர்ந்தவனா?”

“விளையாடும்போது நீ சிறப்பாக பந்து வீசுகிறாயா அல்லது பந்தை எறிகிறாயா?”இந்தக் கேள்விகளுக்குத் தனது ‘800’ படத்தின் மூலம் இயக்குநர் ஸ்ரீபதி பதிலளிக்க முயன்றுள்ளார் என்று இந்தப் படத்திற்கு விமர்சனம் எழுதியுள்ள ‘டைம்ஸ் ஆஃப் இந்தியா’ இணையதளம் குறிப்பிட்டுள்ளது.

முத்தையா முரளிதரனின் வாழ்க்கையை உண்மையாக ‘800’ திரைப்படம் பிரதிபலிப்பதாக அந்த விமர்சனத்தில் குறிப்பிடப்பட்டுள்ளது.

அவரது வாழ்க்கையில், சிறுவயது முதல் நடந்த இலங்கை உள்நாட்டு யுத்தம், பள்ளி, கல்லூரிகளில் எதிர்கொண்ட சிக்கல், கிரிக்கெட் போட்டிகளில் எதிர்கொண்ட சவால், பாகிஸ்தான் சுற்றுப் பயணத்தின் போது பயங்கரவாதத் தாக்குதலில் சிக்கியது, தனது கடைசி டெஸ்ட் கிரிக்கெட் போட்டியில் 800வது விக்கெட்டை கைப்பற்றியது எனப் பல சம்பவங்கள் காட்சிகளாக இடம்பெற்றுள்ளன.

இலங்கை கிரிக்கெட் அணியின் முன்னாள் கேப்டனான அர்ஜூன் ரணதுங்கா எப்படி முத்தையா முரளிதரனுக்கு ஆதரவாக இருந்தார் என்பது காட்சிகளாக விவரிக்கப்பட்டிருந்தாலும், அணியில் பிற வீரர்கள் முத்தையா முரளிதரனிடம் எப்படி நடந்து கொண்டார்கள் என்பது கதையில் இடம்பெறவில்லை.

இலங்கை கிரிக்கெட் அணியில் ஒரே தமிழ் வீரராக இருந்த முத்தையா முரளிதரனுக்கு அணியில் பிற வீரர்கள் எப்படி ஆதரவளித்தனர் என்பது சரியாக விவரிக்கப்படவில்லை என ‘டைம்ஸ் ஆஃப் இந்தியா’ இணையதளம் விமர்சனம் எழுதியுள்ளது.

அதேபோல முத்தையா முரளிதரன் மீது பந்தை எறிகிறார் என எழுந்த குற்றச்சாட்டு குறித்து இன்னும் விளக்கமான காட்சிப்படுத்தல் இருந்திருக்கலாம் என அந்த விமர்சனத்தில் குறிப்பிடப்பட்டுள்ளது.

ஒரு கிரிக்கெட் வீரரின் வாழ்க்கையைப் படமாக்க முயற்சி செய்ததில், படத்தின் முதல் பாதியில் உணர்ச்சிப்பூர்வமான காட்சிகள் ஏதும் இல்லாமல், இசையமைப்பாளர் ஜிப்ரானின் இசையை மட்டுமே வைத்துக் கொண்டு முதல் பாதி படம் நகர்கிறது என ‘டைம்ஸ் ஆஃப் இந்தியா’ விமர்சித்துள்ளது.

ஆனால் இரண்டாவது பாதியில் ஒரு சில காட்சிகள் சுவாரஸ்யமாக காட்சிப்படுத்தப்பட்டுள்ளது என்றும் குறிப்பாக முரளிதரனின் கடைசி டெஸ்ட் கிரிக்கெட் காட்சிகள் நல்ல அனுபவத்தைத் தருவதாக ‘டைம்ஸ் அஃப் இந்தியா’ விமர்சனம் வழங்கியுள்ளது.

பலம் சேர்க்கும் இசை

‘800’ படம் குறித்து மாலை மலர் இணையதளம் எழுதியுள்ள விமர்சனத்தில் படத்தின் நாயகனான மதுர் மிட்டல், முடிந்தவரை முத்தையா முரளிதரனாக நடிக்க முயன்றுள்ளார். அவரது உடல் மொழி, முகத்தோற்றம் ஆகியவற்றில் அதிக கவனம் செலுத்தியிருக்கிறார்.

நாயகி மகிமா நம்பியார் சில காட்சிகளே வந்தாலும் மனதில் நிற்கும்படி நடித்துள்ளார் என்று மாலை மலர் இணையதளம் விமர்சனம் எழுதியுள்ளது.

விடுதலைப் புலிகள் அமைப்பின் தலைவர் பிரபாகரன் தோற்றத்தில் நரேன் நடித்துள்ளார். அந்தக் காட்சிகள் வரும்போது திரையரங்கில் விசில் பறப்பதாக அந்த விமர்சனம் குறிப்பிடுகிறது.

பலருக்கும் தெரியாத முத்தையா முரளிதரனின் வாழ்க்கையில் அவர் கடந்து வந்த பாதையை இயக்குநர் ஸ்ரீபதி அழகாக படமாக்கியுள்ளதாக மாலை மலர் எழுதியுள்ளது.

இலங்கை அணியில் சேர்வதற்கும், சேர்ந்த பிறகும் அவர் எதிர்கொண்ட சிக்கல்கள் குறித்து திரைக்கதையில் அழுத்தமாகப் பதிவு செய்யப்பட்டிருக்கிறது. படத்திற்கு பெரிய பலமாக ஜிப்ரானின் இசை உள்ளதாக மாலை மலர் விமர்சனம் வழங்கியுள்ளது.

பலவீனமாக இருக்கும் கிராபிக்ஸ் காட்சிகள்

விளையாட்டு வீரர்கள் குறித்து எடுக்கப்படும் படங்கள் எப்போதுமே உணர்ச்சிபூர்வமாக இருக்கும். அந்த வரிசையில் இயக்குநர் ஸ்ரீபதியின் ’800′ திரைப்படமும் இணைந்திருக்கிறது என இந்தியா டுடே விமர்சனம் எழுதியிருக்கிறது.

இலங்கையில், தமிழர்களுக்கும், சிங்கள மக்களுக்கும் இடையே நடந்த மோதல் குறித்து ’800′ திரைப்படம் அலசியிருக்கிறது. இந்த பிரச்னை முத்தையா முரளிதரனின் வாழ்வில் எப்படி பிரதிபலித்தது, அரசியல் ரீதியாக அவர் எதிர்கொண்ட அழுத்தங்கள் எனப் பல அடுக்குகளாக ’800′ படம் விரிகிறது என்று அதில் குறிப்பிடப்பட்டுள்ளது.

அரசியல், கிரிக்கெட் என இரண்டு தளங்களிலும் முத்தையா முரளிதரன் எதிர்கொண்ட சிக்கல்களை ’800′ திரைப்படம் அழகாக காட்சிப்படுத்தியுள்ளதாக இந்தியா டுடே குறிப்பிட்டுள்ளது.

முத்தையா முரளிதரன் கதாபாத்திரத்தில் நடித்துள்ள மதுர் மிட்டலின் கண்களின் வழியே வெளிப்படும் நடிப்பு அபாரமானது என்றும், முத்தையா முரளிதரனாக திரையில் வாழ்ந்துள்ளார் என்றும் இந்தியா டுடே எழுதியுள்ளது.

’800′ திரைப்படத்திற்கு கூடுதல் பலமாக இசையும், ஒளிப்பதிவும் அமைந்திருக்கிறது. ஆனால் கிராபிக்ஸ் காட்சிகளுக்குக் கூடுதல் கவனம் செலுத்தியிருக்கலாம் என்று இந்தியா டுடே தனது விமர்சனத்தில் எழுதியுள்ளது.

சில குறைகள் இருந்தாலும், ஒரு முழுநீள விளையாட்டுப் படத்தை தியேட்டரில் பார்க்கும்போது கிடைக்கும் நல்ல அனுபவத்தை ’800′ திரைப்படம் வழங்கும் என இந்தியா டுடே இணையதளம் விமர்சனம் வழங்கியுள்ளது.

மாயா, கேம் ஓவர் ஆகிய திகில் திரைப்படங்களின் மூலம் ஏற்கெனவே கவனத்தை ஈர்த்த அஸ்வின் சரவணனின் அடுத்த படம் இது. 99 நிமிடங்களே ஓடக்கூடிய இந்தப் படத்தின் ட்ரெய்லர் வெளியானதிலிருந்தே நல்ல எதிர்பார்ப்பு இருந்தது. அதை கனெக்ட் படம் பூர்த்தி செய்திருக்கிறதா?

இந்தப் படத்தின் கதை இதுதான்

ஜோசப்பும் (வினய்) சூசனும் (நயன்தாரா) கணவன், மனைவி. இவர்களுடைய பதின்பருவ மகள் ஆன்னா (ஹனியா நஃபீஸ்). சூசனின் தந்தை ஆர்தர் (சத்யராஜ்). ஜோசப் மருத்துவராக இருக்கிறார்.

இந்த நிலையில், கோவிட் தொற்று பரவ நாடு முழுவதும் முழு அடைப்பு பிரகடனப்படுத்தப்படுகிறது. மருத்துவமனையிலேயே தங்கி கோவிட் நோயாளிகளுக்கு சிகிச்சை அளிக்கும் ஜோசப், கோவிட் தாக்கி இறந்து விடுகிறார்.

தந்தையின் பிரிவைத் தாங்க முடியாத மகள் ஆன்னா, ஓஜா பலகையின் உதவியுடன் தந்தையின் ஆவியோடு பேச முயற்சிக்கிறார். ஆனால், அதில் ஒரு விபரீதம் நடந்து விடுகிறது. அது என்ன விபரீதம், அதிலிருந்து சூசனும் ஆன்னாவும் மீண்டார்களா என்பது மீதிக் கதை.

தமிழ் சினிமாவில் நகைச்சுவைப் பேய்களின் காலம் முடிந்துவிட்டதைப் போலத் தெரிகிறது. ஆகவே, திகிலூட்டும் பேய்களோடு களமிறங்க ஆரம்பித்துள்ளனர் தமிழ் இயக்குநர்கள்.

“இந்தப் படத்தைப் பொறுத்தவரை, காட்சிகளுக்கு காட்சி பார்வையாளர்களை அச்சுறுத்தும் அனுபவத்தை கொடுக்க வேண்டும் என்ற இயக்குநரின் எண்ணம் புரிந்தாலும்  மொத்தப் படமுமே வெறும் ‘திகில்’ அனுபவத்துடன் சுருங்கி நிற்பது பெரும் ஏமாற்றம் என்கிறது,” இந்து தமிழ் திசையின் இணையதளம்.

“விறுவிறு படம், ஆனால், திகட்டுகிறது”

“பிரதான கதைக்களமாக ஒரு வீடு, ஐந்து – ஆறு கதாபாத்திரங்களை மட்டுமே வைத்து ஒட்டுமொத்த படத்தையும் முடித்திருக்கிறார் இயக்குநர் அஸ்வின்.  தொடக்கத்தில் விறுவிறுப்புடன் நகரும் படம், ஒரு கட்டத்திற்குப் பிறகு கதைக்கான தேவையை எழுப்புகிறது. ஆனால், அந்த தேவைக்கான தீனி திரைக்கதையில் இல்லாமல் வெறுமனே ஹாரராக மட்டுமே காட்சிகள் நகர்ந்துகொண்டிருப்பது ஒரு இடத்திற்கு பிறகு திகட்டிவிடுகிறது.

காட்சிகளுக்கு காட்சி பார்வையாளர்களை அச்சுறுத்தும் அனுபவத்தை கொடுக்க வேண்டும் என்ற இயக்குநரின் எண்ணம் புரிகிறது. இருப்பினும் மொத்தப் படமுமே வெறும் ‘திகில்’ அனுபவத்துடன் சுருங்கி நிற்பது பெரும் ஏமாற்றம்.

அதிலும் குறிப்பாக படம் இறுதி கட்டத்தை நோக்கி நகரும்போது, அடுத்தடுத்த காட்சிகளையும், படத்தின் முடிவையும் நம்மால் எளிதாக ஊகிக்க முடிவதால் சுவாரஸ்யமும், விறுவிறுப்பும் தணிந்துவிடுகிறது.

திகில் உணர்வைத்தாண்டி மற்ற எந்த உணர்ச்சிகளுக்கும் வேலைகொடுக்காத திரைக்கதையில் சில இடங்களில் வரும் சென்டிமென்ட் ‘கனெக்ட்’ ஆகவில்லை.

“ஆவி பறக்கும் கதை”

பேய் படங்களில் வண்டியில் ஏற்றப்படும் கிறிஸ்துவர்கள், தேவாலயம், ஃபாதர் என்ற டெம்ப்ளேட் இந்தப் படத்தில் மிஸ் ஆகாமல் இடம்பெற்றிருப்பதுடன், இறுதியில் மரம் வளர்ப்போம் என்ற மெசேஜ் காரணமில்லாமல் சொல்லப்படுவதுடன் நயன்தாராவின் முந்தைய படமான ‘ஓ2’-வை நினைவுப்படுத்துகிறது” என விமர்சித்துள்ளது இந்து தமிழ் திசை.

இதுபோன்ற விமர்சனங்கள் முன்வைக்கப்பட்டாலும், வேறு சில ஊடகங்கள் படம் சிறப்பாக இருப்பதாகவே கூறுகின்றன. குறிப்பாக இந்துஸ்தான் டைம்ஸின் தமிழ் இணையதளம், கனெக்ட் திரைப்படம் ‘ஆவி பறக்கும் கதை’ என பாராட்டியுள்ளது.

“ஒரு கிறிஸ்தவ குடும்பம், அவர்கள் சார்ந்த முறையில் ஒரு பேயை ஓட்டும் முறை, இதுவரை பார்த்திராத வித்தியாசமாகவே இருந்தது. குடும்பத்தை பிரிந்து தவிக்கும் வினய், குடும்பத் தலைவனை பிரிந்து நோகும் மனைவி, மகள். விதவையான மகளின் நிலையை எண்ணி வருந்தும் தந்தை என குடும்ப உறவுகளின் உணர்வுகளுக்குள், ஆவி பறக்கும் கதையாக கனெக்ட் ஆகிறது கனெக்ட்.

பரபரப்பாக நகரும் அதே நேரத்தில் கொஞ்சமும் திகில் மாறாமல், சஸ்பென்ஸோடு நகர்த்தப்படும் திரைக்கதைக்கு இயக்குநர் அஸ்வின் சரவணனை பாராட்டலாம் மொத்தத்தில் கனெக்ட், எல்லாவிதத்திலும் கனெக்ட் ஆகிறது. நம்பி போகலாம்” என்கிறது இந்துஸ்தான் டைம்ஸ் தமிழ்.

பேய் பிடித்தவர்களுக்கு சாமியாரோ, பாதிரியாரோ வந்து பேய் ஓட்டுவதும் அப்போது நடக்கும் சம்பவங்களும் உலகம் முழுவதுமே பேய்ப் படங்களுக்கான மிகப் பெரிய அடிப்படைக் கதையாக இருந்துவருகின்றன. ஆனால், அந்தக் கதைகளில் உள்ள வித்தியாசமும் அவை படமாக்கப்பட்ட விதமுமே அவற்றை சிறந்த படமாக்குகின்றன.

அந்த வகையில் பார்த்தால், அஸ்வின் சரவணனின் இந்தப் படம் ஆங்காங்கே திகிலூட்டினாலும் அழுத்தமான கதை இல்லாதது படத்தின் பலவீனம் என்கிறது டைம்ஸ் ஆஃப் இந்தியா நாளிதழின் விமர்சனம்.

“ஆன்லைனில் பேயை விரட்டும் புதுமை இயக்குநர்”

“கனெக்ட் படத்தின் ஆரம்பக் காட்சிகள் சுவாரஸ்யமாகவே இருக்கின்றன. ஒரு முழுமையான திகில் திரைப்படத்திற்கான அனுபவத்தைத் தருகின்றன.

ஆனால், படம் நகர நகர, கடந்த 30 ஆண்@VigneshShivN டுகளாக நாம் பார்த்த திகில் திரைப்படங்களில் வரும் காட்சிகளின் தொகுப்பைப் போல படம் நகர்கிறது. மிகப் பழமையான பேயோட்டும் கதைக்கு சிரமப்பட்டு  புதுமையை அளிக்க முயற்சிக்கிறார் இயக்குநர். என்ன புதுமை? பேயோட்டுவதை அதிவேக இணைய இணைப்புடன் ஆன் லைனில் செய்கிறார்கள்.

திடுக்கிட வைக்கும் காட்சிகள் நன்றாகவே இருக்கின்றன. தீய சக்தியைக் காட்சிப்படுத்தியிருப்பதும் நன்றாகவே இருக்கிறது. ஆனால், அடிப்படைக் கதைதான் பிரச்னை. இறந்துபோனவர்களுக்கோ, தீய சக்திக்கோ ஒரு பின்னணிக் கதை இல்லாமல் இருப்பதுகூட ஓகேதான். ஆனால், எல்லாவற்றையும் இணைக்கக்கூடிய ஒரு கோடு வேண்டாமா?” எனக் கேள்வி எழுப்புகிறது டைம்ஸ் ஆஃப் இந்தியா.

இதே மாதிரியான விமர்சனத்தையே, அதாவது ஏற்கனவே பார்த்த பல பேயோட்டும் கதையைக் கொண்ட திரைப்படங்களைப் போலவே இந்தப் படமும் இருப்பதாகக் கூறுகிறது The South First இணையதளம். “திகில் பட ரசிகர்களைப் பொறுத்தவரை பேயோட்டுவது என்பது புதிதல்ல. கனெக்ட் படமும் அந்த மாதிரிதான். ஆனால், பல காட்சிகள் முந்தைய பல பேய்ப் படங்களை நினைவுபடுத்துகின்றன.

ஏற்கெனவே நாம் பார்த்துப் பழகிப்போன காட்சிகளாகவே இருந்தபோதும், கதையோட்டத்தோடு ரசிகர்களை ஒன்றவைக்கிறது இந்தப் படம். ஆங்காங்கே படம் மெதுவாக நகர்ந்தாலும் படத்தின் பெரும் பகுதி விறுவிறுப்பாகவே இருக்கிறது.

ஒரு வழக்கமான கதையை படத்தின் தொழில்நுட்ப அம்சங்கள் மேம்படுத்திக் காட்டியிருக்கின்றன. திகில் பட ரசிகர்கள் கண்டிப்பாக பார்க்கலாம்” என்கிறது தி சவுத் ஃபர்ஸ்ட் இணையதளம்.

இந்தப் படத்தின் நடித்திருக்கும் நயன்தாரா, வினய், ஹனியா நஃபீஸா ஆகியோரின் நடிப்பை எல்லா ஊடகங்களுமே பாராட்டியுள்ளன. அதேபோல, படத்தின் தொழில்நுட்ப அம்சங்களும் பின்னணி இசையும் ஊடகங்களின் பாராட்டைப் பெற்றுள்ளன

நடிகர்கள்

சாம் ஒர்திங்டன், ஜோ சல்தானா, சிகோர்னி வீவர், ஸ்டீபன் லாங், கேட் வின்ஸ்லெட், க்ளிஃப் கர்டிஸ், ஜோயல் டேவிட் மூர். ஒளிப்பதிவு

ரஸ்ஸல் கார்ப்பன்டர்

இசை

சிமோன் ஃப்ராங்ளன்;

கதை இயக்கம்

ஜேம்ஸ் கேமரான்.

2009ஆம் ஆண்டில் வெளிவந்த அவதார் திரைப்படத்தின் அடுத்த பாகம் இது. முதல் பாகம் வெற்றியடைந்ததும் அடுத்த பாகத்தை 2014ஆம் ஆண்டில் வெளியிடத் திட்டமிடப்பட்டிருந்தது.

ஆனால், மேலும் சில பாகங்களை உருவாக்க நினைத்ததாலும், புதிய தொழில்நுட்பம் தேவைப்பட்டதாலும் முதல் பாகம் வெளியாகி 13 ஆண்டுகளுக்குப் பிறகு இந்த இரண்டாம் பாகம் வெளியாயிருக்கிறது.  முதல் பாகம் வெளியாகி 13 ஆண்டுகள் கடந்துவிட்டாலும், உற்சாகம் குறையாமல் இந்தத் திரைப்படத்திற்காக ரசிகர்கள் காத்திருந்தனர்.

இப்போது உலகம் முழுவதும் சுமார்  50,000க்கும் மேற்பட்ட திரையரங்குகளில் இந்தப் படம் தற்போது வெளியாகியிருக்கிறது. உலகில் அதிக பொருட்செலவில் தயாரிக்கப்பட்டிருக்கும் படங்களில் இதுவும் ஒன்று.

முதல் பாகம், பண்டோராவின் வனப் பகுதியில் நடந்தது எனில், இந்த இரண்டாவது பாகம் கடலுக்கு முக்கியத்துவம் கொடுத்து எடுக்கப்பட்டிருக்கிறது.

படத்தின் கதை இதுதான்

மனிதனாக இருந்து நவியாக மாறிய ஜாக் சல்லியும் நவியின் இளவரசி நேத்ரியும் சேர்ந்து 4 குழந்தைகளைப் பெற்றுக்கொண்டு சந்தோஷமாக வாழ்ந்து வருகிறார்கள்.

ஆகாயவாசிகள் Vs மனிதர்கள்

அவர்களோடு மனிதக் குழந்தையான ஸ்பைடரும் ஒன்றாக வாழ்கிறான். ஆனால், பூமியில் வசிக்கும் மனிதர்கள் இவர்களை நிம்மதியாக இருக்க விடுவதில்லை.

மீண்டும் பண்டோராவுக்கு வரும் அவர்கள், ஜாக்கை பிடித்து ஒழிக்க நினைக்கிறார்கள். இதனால், அங்கிருந்து ஜாக்கின் குடும்பம் புறப்பட்டு கடல் பிரதேசத்தில் வாழும் மெட்கயினாவுக்கு வருகிறது.

புதிய சூழலோடு அவர்கள் பொருந்த நினைக்கையில், அங்கேயும் வந்துவிடுகிறார்கள் ஆகாயவாசிகளான மனிதர்கள். அவர்களை வென்று, நவி குடும்பத்தினர் நிம்மதியாக வசித்தார்களா என்பதுதான் மீதிக் கதை.

இந்தப் படம் மிகச் சிறப்பாக வந்திருப்பதாகக் கூறும் டைம்ஸ் ஆஃப் இந்தியா நாளிதழ், இதற்கு 4.5 நட்சத்திரங்களைக் கொடுத்திருக்கிறது. இந்த வருடத்தின் மிகச் சிறந்த சினிமா அனுபவம் இந்தப் படம் என்கிறது அந்த நாளிதழ்.

“இந்த முறை கதை பசுமையான காடுகளில் இருந்து பவளப்பாறைகள் நிரம்பிய கடலுக்கு நகர்ந்திருக்கிறது. ஆனாலும் முந்தைய படத்தைப் போலவே மெய்மறக்க வைக்கிறது. அந்தக் கடல் மனிதர்களின் உலகில் மூன்று மணி நேரத்திற்கு மேல் நீங்கள் மூழ்கிவிடுவீர்கள்.

இந்த இரண்டாம் பாகத்தில் ஆக்ஷன், உணர்ச்சிகரமான காட்சிகள் ஆகிய இரண்டுக்கும் முக்கியத்துவம் தரப்பட்டிருக்கிறது. அடிப்படையில் பார்த்தால் இந்தக் கதை ஒன்றும் புதுமையானதல்ல.  ஆனால், கதை சொல்லப்பட்ட விதமும் காட்சி ரீதியான அனுபவமும் இதனை ஒரு காவியத் திரைப்படமாக்கியிருக்கின்றன.

“அவதார் உலகுக்கு அழைத்துச் செல்லும் படம்”

இந்தப் படத்திற்குள் மூழ்கியிருக்கும்போது, நீங்கள் நிஜ உலகிற்குத் திரும்பவே விரும்ப மாட்டீர்கள்” என்கிறது டைம்ஸ் ஆஃப் இந்தியா நாளிதழ்.

அவதாரின் முதல் பாகம், அதனுடைய கதை – திரைக்கதை, காட்சி அனுபவம் ஆகியவற்றுக்காகப் பேசப்பட்டாலும், அதிலிருந்த அரசியல் குறியீடுகளும் சூழல்சார்ந்த கருத்துகளும் பெரிதும் கவனிக்கப்பட்டன. இந்தப் படமும் அதே பாணியில் தொடர்வதைத்தான் சுட்டிக்காட்டுகிறது என்கிறது டைம்ஸ் ஆஃப் இந்தியாவின் விமர்சனம்.

“மாயமான, கற்பனை உலகில் கதை நடந்தாலும், சமூக – அரசியல் கருத்துகளும் படத்தில் இல்லாமல் இல்லை.  இனம், நாகரீகம் குறித்த விவாதங்களை எழுப்பும் இந்தக் கதை, ராணுவ நடவடிக்கைகளுக்கு எதிரான கருத்தையும் முன்வைக்கிறது. அதே நேரம் சுற்றுச்சூழலின் முக்கியத்துவம் குறித்தும் பேசுகிறது.

பெற்றோர் குழந்தைகளைக் காப்பாற்றும் அதே நேரத்தில் குழந்தைகளும் பெற்றோரைக் காப்பாற்றும் உச்சகட்ட காட்சி அட்டகாசமாக இருக்கிறது.

13 ஆண்டுகளுக்கு முன்பு வெளிவந்த முதல்பாகம், விஷுவல் எஃபக்ட்ஸ் காட்சிகளுக்கு ஒரு உயர் தரத்தை நிறுவியது. இந்தப் படம் ஒரு அடி அதனைத் தாண்டிச் சென்றிருக்கிறது.

முப்பரிமாணம் என்பதை, இன்னொரு வித்தையாகப் பயன்படுத்தாமல் பார்வையாளர்களின் அனுபவத்தை அதிகரிக்கப் பயன்படுத்தியிருக்கிறார் இயக்குநர்.

இந்த வருடத்தின் மிகச் சிறந்த சினிமா அனுபவம் இந்தப் படம்” என்கிறது டைம்ஸ் ஆஃப் இந்தியா நாளிதழ்.

இந்தியா டுடே வார இதழும் இந்தப் படத்தை வெகுவாகப் புகழ்ந்திருக்கிறது. நான்கு நடசத்திரங்களை இந்தப் படத்திற்கு வழங்கியிருக்கிறது.

“அவதாரின் முதலாவது பாகம் காடுகளைப் பாதுகாப்பது பற்றியும் மனிதனின் பேராசை எப்படி நமது கிரகத்தை அழித்து வருகிறது என்பது பற்றியும் பேசியது. இரண்டாவது படம் கடலைப் பற்றியும் கடல்வாழ் உயிரினங்களைப் பற்றியும் பேசுகிறது.

இரண்டு படங்களுமே, ஒன்றோடு ஒன்று ஆழமான உறவைக் கொண்டிருக்கின்றன.  இந்தப் படத்தில் வரும் காட்சிகளும் பாத்திரங்களும் நம் கிரகம் எதிர்கொள்ளும் முக்கியப் பிரச்சனைகள் குறித்து உபதேசிக்காத தொனியில் பேசுகின்றன.

படம் துவங்கும் முதல் காட்சியிலிருந்தே நாம் உள்ளே மூழ்கிப் போகிறோம். அவதார் பட வரிசையில் இந்தப் படத்தைத்தான் முதலில் நீங்கள் பார்க்கிறீர்கள் என்றால்கூட,  முப்பரிமாணத் தொழில்நுட்பத்தை கேமரான் பயன்படுத்தியிருக்கும் விதமும் அவர் உருவாக்கியிருக்கும் காட்சி அற்புதங்களும் அவர் காட்டும் காடுகளில் வரும் தாவரங்களும் கடல்களில் தெரியும் மீன்களும் பவளப் பாறைகளும் அதன் வண்ணங்களும் உங்களை மயக்கி உள்ளே இழுத்துவிடும்” என்கிறது இந்தியா டுடேவின் விமர்சனம்.

ஆனால், அவதாரின் இரண்டாம் பாகத்தைப் பார்த்த சில ரசிகர்கள் படம் வெகு நீளமாக இருப்பதாகவும் சில சமயங்களில் அலுப்பூட்டுவதாகவும் சொல்கிறார்கள். இந்தியா டுடே இதழின் விமர்சனமும் அதனைச் சுட்டிக்காட்டுகிறது.

“முதல் பாதியில் சற்று தடுமாற்றம் இருக்கிறது. படத்தின் இந்தப் பகுதியில் பல புதிய, பழைய பாத்திரங்களை அவர் அறிமுகப்படுத்துவதால், யார் என்ன செய்கிறார்கள் என்ற குழப்பம் ஏற்படுகிறது. சில காட்சிகள் மிக நீளமாக இருப்பதால், காட்சிகளின் அழகைக் காட்டுவதற்காகவே அவை வைக்கப்பட்டதைப் போல இருக்கின்றன” என்கிறது இந்தியா டுடே.

இருந்தபோதும் கண்டிப்பாக பார்க்க வேண்டிய திரைப்படம் என்பதையும் இந்தியா டுடே விமர்சனம் சுட்டிக்காட்டுகிறது.

“மேலே குறிப்பிட்ட தடைகளைத் தாண்டி, இரண்டாவது பாகம் வேகமெடுக்கிறது. பண்டோராவின் உள்ளே உங்களை இழுத்துக் கொள்கிறது.   கேமரானின் மிகப் பெரிய பலமே, நீங்கள் விரும்பக்கூடிய பாத்திரங்களை உருவாக்குவதுதான். டைட்டானிக் திரைப்படத்தில் பனிமலை கப்பலோடு மோதும் காட்சியைவிட, ஜாக்கிற்கும் ரோஸிற்கும் இடையிலான காதல்தான் ரசிகர்களை ஈர்த்தது. அவதார் படத்திலும் இதுபோன்ற காட்சிகளே ஜாக் சல்லியின் குடும்பத்தினரோடு ஒன்ற வைக்கிறது.

சினிமா வரலாற்றின் மிகப் பெரிய திரைப்படத்திற்கு, மிகச் சரியான இரண்டாவது பாகம். பார்க்கத் தவறவிடாதீர்கள்” என்கிறது இந்தியா டுடே வார இதழின் இணைய தளம்.

இந்து தமிழ் திசையின் விமர்சனத்தைப் பொறுத்தவரை, படம் குறித்து பெரும் பாராட்டுகளை முன்வைத்திருந்தாலும் சில விமர்சனங்களையும் சுட்டிக்காட்டியிருக்கிறது.

“‘அவதார்’ படத்தின் முதல் பாகம் ஒரு புதிய உலகை பார்வையாளர்களுக்கு அறிமுகப்படுத்தி விறுவிறுப்பையும், சுவாரஸ்யத்தையும் கூட்டியிருந்தது. அதன் நீட்சியாக வந்துள்ள இந்த இரண்டாம் பாகத்தில் எந்தவித புதுமையும் நுழைக்கப்படாமல் திரைக்கதையில் ஆங்காங்கே கற்பனை வறட்சி மேலிடுகிறது. காட்சிகளாக பிரமாண்டமாக விரியும் இந்த படத்தில், கதையில் இருந்து வெளிப்படும் சுவாரஸ்யம் சொற்பமே.

கனிம சுரண்டலுக்கு எதிராக நிற்கும் வேற்று கிரகவாசிகளின் போராட்டம், அவர்களது உறுதி என முதல் பாகத்திலிருந்த கதையின் அடர்த்தி, இரண்டாம் பாகத்தில் வெறும் குடும்பக் கதையாக சுருண்டு, வறண்டிருப்பது ஏமாற்றம். வெறுமனே நாயகன் ஜேக் சல்லி தனது குடும்பத்தை எதிரிகளிலிருந்து காப்பாற்ற போராடிக்கொண்டும், சென்டிமென்ட் காட்சிகள் வழியே உரையாடிக் கொண்டுமிருப்பது சோர்வளிக்கிறது” என்கிறது இந்து தமிழ் திசை.

இருந்தபோதும் அட்டகாசமான காட்சி அனுபவத்தை வழங்கி,  ‘குடும்பங்கள் கொண்டாடும்’ ஹாலிவுட் திரைப்படம் என்றும் கூறியிருக்கிறது இந்து தமிழ் திசை.

ஒட்டுமொத்தமாகப் பார்க்கும்போது, அவதாரின் முதல் பாகத்திலிருந்து காட்சி அனுபவத்தைவிட, இந்தப் பாகம் சிறப்பான காட்சி அனுபவத்தைத் தந்தாலும், படத்தின் நீளமும் கதையில் போதிய ஆழமின்மையும் சோர்வளிப்பதாக விமர்சனங்கள் கூறுகின்றன.

ஐந்தாண்டுகளாக எந்த படத்திலும் நடிக்காமல் இருந்த வடிவேலு, இந்த நாய் சேகர் ரிட்டர்ன்ஸ் படத்தின் மூலம்  திரையுலகிற்கு மீண்டும் வந்திருக்கிறார்.

தலை நகரம் படத்தில் வடிவேலு ஏற்று நடித்த ஒரு பாத்திரத்தின் பெயரை, படத்திற்குச் சூட்டியதன் மூலம், நல்ல எதிர்பார்ப்பை ஏற்படுத்தியிருந்தார் இயக்குநர் சுராஜ். ஆனால், இந்த எதிர்பார்ப்பை படம் ஈடு செய்ததா? இந்தப் படத்தின் கதை இதுதான்:

பணக்கார வீட்டின் நாய்களை  கடத்தி, அதன் உரிமையாளர்களிடம் பணம் பறிக்கும் கடத்தல் மன்னன் நாய் சேகர் (வடிவேலு). ஒரு முறை தெரியாமல், பயங்கர தாதா ஒருவரின் நாயைக் கடத்தி சிக்கலில் மாட்டிக்கொள்கிறார்.

இந்த நிலையில், நாய் சேகரின் குடும்பத்திற்குச் சொந்தமான நாயையே ஒருவர் கடத்தி வைத்து, அதன் ராசியால் பணம் சம்பாதிப்பதைத் தெரிந்து கொண்டு, அதை மீட்க புறப்படுகிறார். இறுதியில் தனது நாயை நாய் சேகர் மீட்டாரா? இதில் என்ன பிரச்சனைகள் ஏற்பட்டன என்பது மீதிக் கதை. இந்தப் படத்திற்கு இப்போது ஊடகங்களில் விமர்சனங்கள் வெளியாகிவருகின்றன. பல ஊடகங்கள் இந்தப் படம் குறித்து கலவையான விமர்சனங்களையே முன்வைத்துள்ளன.

வடிவேலு தன்னால் முடிந்த நடிப்பையும், உழைப்பையும் செலுத்தியிருந்தாலும்  மொத்தப் படமும் முழுமையற்று ஒரு சில காமெடி காட்சிகளை மட்டும் பார்த்த உணர்வைத் தருகிறது.

கதையாகவோ, திரைக்கதையாகவோ எந்த இடத்திலும் அழுத்தம் இல்லாமல் நகர்கிறது என்கிறது இந்து தமிழ் திசையின் விமர்சனம்.

வடிவேலுவின் ரீஎன்ட்ரிக்கு உழைத்த இயக்குநர்

வடிவேலுவுக்கு வெற்றி கொடுக்கும் முயற்சியில் இயக்குநர் ஓரளவு வென்றிருக்கிறார்.  மொத்தத்தில் எதிர்பார்ப்பு இல்லாமல் சென்றால் ’நாய் சேகர் ரிட்டன்ஸ்’ நகைச்சுவைகளை ரசிக்கலாம் என்கிறது தினமணி நாளிதழின் இணையதளம்.

படத்தின் நீளமும் சில காமெடி காட்சிகளும் மக்களை ஏமாற்றினாலும் பல இடங்களில் காமெடி பயங்கரமாக ஒர்க் அவுட் ஆகி குழந்தைகள் முதல் பெரியவர்கள் வரை அனைவரும் ரசிக்கும் ஒரு கலகலப்பான படமாக அமைந்திருக்கிறது நாய் சேகர் ரிட்டன்ஸ் என்கிறது இந்தியன் எக்ஸ்பிரஸ் தமிழ் இணையதளம்.

“சுராஜ் இயக்கியிருக்கும் இப்படத்தின் முதல் பாதி திரைக்கதையில் நகைச்சுவை வறட்சி தலைவிரித்தாடுகிறது. காமெடியை எதிர்நோக்கி காத்திருக்கும் பார்வையாளர்களுக்கு ஆனந்த்ராஜ் திரையில் தோன்றுவது சற்று ஆறுதல். மற்றபடி, வடிவேலு நாய் கடத்துபவர் என காட்ட நினைத்து வைக்கப்பட்ட பெரும்பாலான காட்சிகள் உப்பு சப்பில்லாதவை.

ஆனந்த்ராஜ் – வடிவேலு நேருக்கு நேர் சந்திக்கும் காட்சிகள் சுவாரஸ்யம். நிறைய காமெடி நடிகர்கள் இருந்தும் அவர்களால் திரைக்கதைக்கு தேவையான நகைச்சுவை கொடுக்க முடியாததாலும், அழுத்தமில்லாத காட்சிகளாலும் வடிவேலுவால் கூட முதல் பாதியைக் காப்பாற்ற முடியவில்லை. இரண்டாம் பாதியில் கண்தெரியாத மாற்றுத்திறனாளியாக ஸ்கோர் செய்கிறார் வடிவேலு.

இடையில் வரும் பாஸ்வேர்டு காமெடியும், க்ளைமாக்ஸும் சிரிப்பலையை எழுப்புகின்றன. இதைத்தாண்டி படத்தில் பெரிய அளவில் சிரிக்கவோ, ரசிக்கவோ, அழுத்தமான திரைக்கதைக்கோ எந்த இடத்திலும் இடமளிக்காதது கைபேசியை கையிலெடுக்க தூண்டுகிறது.” என விமர்சித்துள்ளது இந்து தமிழ் திசை இணையதளம்.

பழைய வடிவேலு எங்கே?

“முதல் பாதியின் இறுதி நிமிடங்களில் கிளைமேக்ஸில் இடம்பெறும் நகைச்சுவை காட்சிகள் படத்திற்கு பலமாக அமைந்துள்ளன.

ஆட்களைக் கடத்தியே பழக்கப்பட்ட தமிழ் சினிமாவில் முதல்முறையாக நாய்களை கடத்தினால் எப்படி இருக்கும் என்கிற புதிய கருவுடன் இயக்குநர் சுராஜ் வந்திருந்தாலும் மேக்கிங் மற்றும் திரைக்கதையில் சொதப்பியுள்ளார்.

நகைச்சுவை மற்றும் உடல் மொழிகளில் புதிதாக எந்த மாற்றமும் இல்லாத நிலையில், புதுப்புது பாணி காட்டும் ’பழைய’ வடிவேலுவை இனிக் காணவே முடியாதோ என்றே எண்ண வைக்கிறது” என்கிறது தினமணி நாளிதழ்.

ஆனால், இந்தப் படம் குறித்து முழுக்க முழுக்க பாசிட்டிவான விமர்சனத்தை அளித்துள்ளது இந்தியன் எக்ஸ்பிரஸ். “நீண்ட வருடங்களுக்குப் பிறகு தமிழ் சினிமாவில் ஹீரோவாக என்ட்ரி கொடுத்திருக்கிறார் வைகை புயல்.

வழக்கமான தன் நக்கல், நையாண்டியான காமெடி கவுண்டர்களாலும், அசத்தலான உடல் மொழியாலும் படம் முழுக்க திகட்ட திகட்ட சிரிப்பை வாரி வழங்கியிருக்கிறார். அவர் சாதாரணமாக பேசும் வசனங்களும், சாதாரணமாக நடக்கும் நடையும் கூட ரசிகர்களுக்கு சிரிப்பை கொடுக்கிறது என்பதை பார்க்கும்போது உண்மையாகவே வைகைப்புயல் “கம்-பேக்”  கொடுத்து விட்டார் என்றே தோன்றுகிறது.

சில ஆண்டுகள் இடைவெளி விட்டு வந்திருந்தாலும், இப்படத்தில் அவருடைய நடிப்பும் காமெடி காட்சிகளும், வசனங்களும் அவர் ஒரு மகா காமெடி கலைஞன் என்பதை மீண்டும் ஒருமுறை நிரூபித்திருக்கின்றன. சின்ன சின்ன சண்டை காட்சிகளில்கூட சிரிப்பை தர இவரால் மட்டுமே முடியும்.

காமெடி நாயகனாக மட்டுமல்லாமல் இப்படத்தின் நான்கு பாடல்களையும் பாடி சிறந்த பாடகராகவும் தன்னை நிலை நிறுத்தியிருக்கிறார் வடிவேலு” என்கிறது இந்தியன் எக்ஸ்பிரஸ். இந்தப் படத்தில் நடித்திருக்கும் நடிகர்களின் நடிப்பைப் பொறுத்தவரை, பொதுவாக அனைத்து ஊடகங்களும் நேர்மறையான விமர்சனங்களையே முன்வைத்துள்ளன.

“நீண்ட இடைவெளிக்குப் பிறகு திரையில் மீண்டும் வடிவேலு. பார்வையாளர்கள் பார்த்துப் பார்த்து ரசித்து குலுங்கி சிரித்த தனது தனித்துவ உடல் மொழியை வார்த்திருக்கிறார். அவருக்கான அறிமுகக் காட்சிகள் கூஸ்பம்ஸ்!

கிட்டத்தட்ட ஒரு மாஸ் ஹீரோவுக்கு இணையான அந்த இன்ட்ரோ காட்சி ரசிக்க வைக்கிறது. தனக்கான பாடி லாங்குவேஜில் ஸ்டைலாக நடந்து வருவது, வசனமற்ற காட்சிகளிலும் தனது முகபாவனையால் சிரிக்க வைப்பது, இங்கிலீஷ் பேசும் அந்த ஸ்டைல், டம்மியான தன்னை மாஸாக காட்ட நினைத்து பல்பு வாங்குவது என ஈர்க்கிறார். ஆனாலும், இயல்பான அந்த வின்டேஜ் வடிவேலு ஏனோ மிஸ்ஸிங்!

அளவோடு நடித்துக் கொடுத்த நடிகர்கள்

ஆனந்த்ராஜ் நகைச்சுவைக் காட்சிகளுக்கான பக்கா மெட்டீயரில்.

ரிட்டையர்டு ரவுடியை வைத்து, டம்மி கூட்டாளிகளுடன் அவர் நடத்தும் ‘கடத்தல்’ தர்பார் பல இடங்களில் ரசிக்க வைக்கிறது. இரண்டாம் பாதியில் வரும் ராவ் ரமேஷின் நடிப்பு கவனம் பெறுகிறது.

ரெடின் கிங்க்ஸ்லீ வழக்கமான தனது பாணியில் சில இடங்களில் புன்முறுவலையும், ஒரு சில காட்சிகளில் சத்தமாக சிரிக்கவும் வைக்கிறார். செட் ப்ராபர்டியாக வருகிறார் ஷிவாங்கி.

பிரசாந்தை முதல் பாதியுடன் முடித்து அனுப்பும் இயக்குநர் அந்த இடத்தில் இரண்டாம் பாதிக்கு ஷிவானியை தேர்ந்தெடுத்துள்ளார்.

தவிர முனிஷ்காந்த், லொள்ளு சபா ஷேஷூ, கேபிஒய் ராமர், கேபி ஓய் பாலா, லொள்ளு சபா மாறன், மனோபாலா தேவையான நடிப்பை பதிவு செய்கின்றனர்.” என்கிறது இந்து தமிழ் திசை. “வடிவேலுவின் குழுவினராக நடித்து வரும் ரெடின் கிங்ஸ்லி, யூ டியூபர் பிரஷாந்த் வரும் காட்சிகள் ரசிக்க வைக்கின்றன.

குறிப்பாக, இருவரும் மற்றொரு ரவுடியான ஆன்ந்த் ராஜிடம் அடி வாங்கும் காட்சிகளில் வயிறு வலிக்கும் அளவிற்கு சிரிப்பு வருகிறது. வில்லனாக மிரட்டிவந்த ஆனந்த் ராஜ் சமீப காலமாக காமெடியில் கலக்கி வருகிறார். இந்தப் படத்திலும் அவர் வரும் காட்சிகளில் இயல்பாக சிரிப்புச் சத்தம் கேட்கிறது. அவர் குழுவில் இடம்பெற்ற லொல்லு சபா சேஷூ, ’என்னம்மா’ ராமர் தங்களுக்கு கிடைத்த சில நிமிடங்களை மிகச் சரியாக பயன்படுத்தியுள்ளனர்” என்கிறது. தினமணி நாளிதழ்.

இந்தப் படத்தில் வடிவேலுவின் நடிப்பை வெகுவாகப் புகழ்ந்திருக்கிறது இந்தியன் எக்ஸ்பிரஸ் இணையதளம். “நீண்ட வருடங்களுக்குப் பிறகு தமிழ் சினிமாவில் ஹீரோவாக என்ட்ரி கொடுத்திருக்கிறார் வைகை புயல். வழக்கமான தன் நக்கல், நையாண்டியான காமெடி கவுண்டர்களாலும், அசத்தலான உடல் மொழியாலும் படம் முழுக்க திகட்ட திகட்ட சிரிப்பை வாரி வழங்கியிருக்கிறார்.

அவர் சாதாரணமாக பேசும் வசனங்களும், சாதாரணமாக நடக்கும் நடையும் கூட ரசிகர்களுக்கு சிரிப்பை கொடுக்கிறது என்பதை பார்க்கும்போது உண்மையாகவே வைகைப்புயல் கம்-பேக் கொடுத்து விட்டார் என்றே தோன்றுகிறது.

சில ஆண்டுகள் இடைவெளி விட்டு வந்திருந்தாலும், இப்படத்தின் அவருடைய நடிப்பும்,காமெடி காட்சிகளும், வசனங்களும்,தான் ஒரு மகா காமெடி கலைஞன் என்பதை மீண்டும் ஒருமுறை நிரூபித்திருக்கிறது. சின்ன சின்ன சண்டை காட்சிகளில் கூட சிரிப்பை தர இவரால் மட்டுமே முடியும். காமெடி நாயகனாக மட்டுமல்லாமல் இப்படத்தின் நான்கு பாடல்களையும் பாடி சிறந்த பாடகராகவும் தன்னை நிலை நிறுத்தியிருக்கிறார் வடிவேலு” என்கிறது இந்தியன் எக்ஸ்பிரஸ் தமிழ்.

உண்மையாகவே இது வடிவேலுவின் சினிமா வாழ்க்கையில் ஒரு காமெடி ரிட்டன் தான் என்கிறது அந்த இதழ். ஆனால், இந்து தமிழ் திசையைப் பொறுத்தவரை “வடிவேலுவின் ‘நாய் சேகர்’ பார்வையாளர்கள் மனதில் நீங்கா இடத்தில் நிலைகொள்ளும் என கருதினால், அது சில காமெடிக் காட்சிகளைத் தாண்டி பெரிய அளவில் ஆட்கொள்ளாமல் கடந்திருக்கிறது” என்பதுதான் முடிவான கருத்தாக இருக்கிறது.

ஒட்டுமொத்தமாக ஊடகங்களில் வந்த விமர்சனங்கள், ரசிகர்கள் ட்விட்டரில் தெரிவிக்கும் விமர்சனங்களைப் பார்க்கும்போது, வடிவேலுவின் காமெடி பல இடங்களில் சிறப்பாக வந்திருந்தாலும், ஒரு படமாக “நாய் சேகர் ரிட்டர்ன்ஸ்” முழுமை பெறவில்லை என்றே தோன்றுகிறது.

ஓர் இரவு, அம்புலி, ஆ ஆகிய படங்களை இயக்கிய ஹரி – ஹரீஷ் இரட்டையரின் லேட்டஸ்ட் படம்தான் இந்த யசோதா. சமந்தா நடித்திருப்பதால், கூடுதல் கவனத்தைப் பெற்றிருக்கிறது இந்தப் படம்.

இன்று வெளியாகியிருக்கும் இந்தப் படத்திற்கு ஊடகங்களில் தற்போது விமர்சனங்கள் வெளியாகிவருகின்றன. இந்தப் படத்தின் கதை இதுதான்: தன்னுடைய தங்கையின் மருத்துவச் செலவுக்குத் தேவைப்படுவதால், யசோதா (சமந்தா)  வாடகைத் தாயாகிறார். அந்த காலகட்டத்தில் ஒரு தனியார் நிறுவனத்தின் பராமரிப்பில் இருக்கிறார்.

மற்றொரு பக்கம், மூன்று பேர் இறந்து போகிறார்கள். காவல் துறை இந்த கொலை வழக்கை விசாரிக்கும்போது, யசோதாவைக் கவனித்துக்கொள்ளும் தனியார் நிறுவனத்தில் பல முறைகேடான விஷயங்கள் நடப்பது தெரிகிறது.

இந்த வழக்குக்கும் யசோதாவுக்கும் என்ன தொடர்பு என்பது மீதிக் கதை.

வாடகைத்தாய் விவகாரத்தில் இத்தனை ஆபத்தா?

வாடகைத்தாய் விவகாரத்தில் நடக்கும் விஷயங்களை நமக்கு அதிர்ச்சியளிக்கும் வகையில் காட்டியிருக்கும் விதத்தில் மிக முக்கியமான படம் என்கிறது இந்து தமிழ் திசையின் விமர்சனம்.

“வாடக்கைத் தாய் விவகாரத்தை கதைக் கருவாக எடுத்துக்கொண்டு அதையொட்டி திரைக் கதையை உருவாக்கி இறுதியில் வேறொரு விஷயத்தை காட்சிப்படுத்தியிருக்கிறார்கள்.

கதாபாத்திரங்களை அறிமுகப்படுத்த அவர்கள் எடுத்துக்கொண்ட நேரம், கதைக் களத்தை அறிமுகப்படுத்துவது என முதல் பாதி பெரிய சுவாரஸ்யங்களற்று பொறுமையாகவே நகர்கிறது.

இடைவேளைக்கு முன்புதான் திரைக்கதை படத்தின் மையத்திற்குள் நுழைகிறது. படத்தின் இரண்டாம் பாதி முழுவீச்சில் விறுவிறுப்பாக நகர்கிறது.

இரண்டு வெவ்வேறு கதைகளும் ஒன்றிணையும் இடமும் இறுதிக் காட்சியில் வரும் திருப்பமும் ரசிக்கும்படியாக இருந்தது. பின்னணி இசை, பாடல்கள், ஒளிப்பதிவு, தொழில்நுட்ப ரீதியாக படம் அதன் பலத்திலிருந்து குன்றவில்லை.சமந்தாவின் கதாபாத்திரம் வாயிலாக பெண்களுக்கான தைரியத்தை கட்டமைத்திருக்கிறார்கள்.

மருத்துவமனைக்கு வருகிற பெண்களை ஆசை வார்த்தை கூறி வாடகைத் தாயாக மாற்றுவது, அதற்குள் நடக்கும் கமிஷன் விவகாரங்கள், முறைகேடான வாடகைத் தாய் முறை, குடும்பச் சூழலால் வாடகைத் தாயாக ஒப்புக்கொள்ளும் பெண்களை தவறாக பயன்படுத்துவது உள்ளிட்டவை ‘யசோதா’ மூலம் வெளிச்சம் பெற்றுள்ளன.

சில சின்ன சின்ன பிரச்சினைகள் இருந்தாலும், ஒட்டுமொத்தமாக முக்கியமான கதைக் களத்தை விறுவிறுப்பாக கொண்டு சென்ற வகையில் கவனிக்க வைக்கிறது இந்த ‘யசோதா’” என்கிறது இந்து தமிழ் திசையின் விமர்சனம்.

சிரமத்துடன் கடக்க வேண்டிய முதல் பாதி

பெயரைப் பார்த்து அந்த யசோதாவை நினைத்துக்கொண்டு செல்லாமல், எதிர்பார்ப்பின்றிச் சென்றால் த்ரில்லான இந்த ‘யசோதா’வை ரசிக்கலாம் என்கிறது தினமணி நாளிதழின் விமர்சனம்.கிரைம் திரில்லர் பாணியில் இந்தப் படம் உருவாகியிருந்தாலும் முதல் பாதியில் சில இடங்களை திரைக் கதைத் தேக்கம் காரணமாக ‘சிரமத்துடன்’ கடக்க வேண்டியிருக்கிறது.

இரண்டாம் பாதியில் சஸ்பென்ஸ் காட்சிகள் கைதட்ட வைக்கின்றன. குறிப்பாக, படத்தின் மையமாக மருத்துவம் சார்ந்த விஷயத்தைக் கையில் எடுத்திருப்பதால் சில காட்சிகளை நம்ப முடியவில்லை.

இதற்கெல்லாம் வாய்ப்பு இருக்காது என்கிற எண்ணமே எழுகிறது. மருத்துவர்களுக்கே வெளிச்சம்.’தி ஃபேமிலி மேன்’ இணையத் தொடரில் முக்கிய கதாபாத்திரத்தில் நடித்து ரசிகர்களை ஆச்சரியப்படுத்திய சமந்தா இந்தப் படத்திலும் தன் வெகுளித்தனமான நடிப்பால் ரசிக்க வைக்கிறார்.

நடிகை வரலட்சுமி சரத்குமார் சர்க்கார் திரைப்படத்திற்கு பின் படத்தில் மீண்டும் எதிர்மறையாக கதாபாத்திரத்தில் நடித்திருக்கிறார்.

வில்லியாக மாறினால் கண்டிப்பாகத் தமிழ் சினிமாவில் ஒரு சுற்று வருவார் என்கிற அளவிற்குக் கதையுடன் ஒன்றி நடித்துள்ளார்.

பெரும்பாலான காட்சிகள் ஒரே இடத்தில் நடப்பதால் திரைக்கதையில் கூடுதல் கவனம் செலுத்தியிருக்கலாம் என்று தோன்றுகிறது” என்கிறது தினமணி நாளிதழ்.

இது முழுக்க முழுக்க சமந்தாவின் திரைப்படம் என்கிறது டைம்ஸ் ஆஃப் இந்தியாவின் விமர்சனம்.”படத்தின் முதல் பாதி, காமெடி மற்றும் உணர்வுரீதியான காட்சிகள் என்று நகர்கிறது.

வாடகைத் தாய்களுக்கான இடத்தில் இருக்கும் மருத்துவருடன் யசோதா கேலியாகப் பேசுவது, அங்கு பணியாற்றுபவர்களுடன் விளையாடுவது, அங்கிருக்கும் பிற வாடகைத் தாய்களுடன் பேசுவது போன்ற காட்சிகள் கலகலப்பாக நகர்கின்றன.

“சமந்தாவின் நடிப்பு சிறப்பு”

அந்த இடத்தைப் பற்றி யசோதா அதிகம் கண்டுபிடிக்க, கண்டுபிடிக்க, காவல்துறையின் விசாரணை தடம் புரண்டுகொண்டே போகிறது. இடைவேளைக்கு முன்பு வரும் சண்டைக் காட்சி, ஒரு சிறப்பான த்ரில்லர் வரப்போகிறது என்பதை முன்னறிவிக்கிறது.

அடுத்து என்ன வரப்போகிறது என்பதை யூகிக்க முடிந்தாலும் (யூகிப்பது கடினம்தான்) படம் சுவாரஸ்யமாகவே நகரும்.

ஆனால், யசோதாவைப் பற்றி, தாயின் அன்பைப் பற்றி, பிரசவம், கர்ப்பம் ஆகியவற்றைப் பற்றியெல்லாம் பேசும்போது சற்று நாடகத்தனமாக நகர்கிறது படம். படத்தின் நீளத்தை அதிகரிப்பதைத் தவிர, இந்தக் காட்சிகளால் வேறு பயன் இல்லை என்பதால் அவை இல்லாமலேயே எடுத்திருக்கலாம்.

கிராஃபிக்ஸ் காட்சிகளும் இன்னும் சிறப்பாக அமைந்திருக்கலாம். கதாநாயகியுடன் தங்கியிருக்கும் பெண்களின் பாத்திரங்கள் இன்னும் சிறப்பாக வடிவமைக்கப்பட்டிருக்கலாம்.

யசோதாவின் பாத்திரத்தில் நடித்திருக்கும் சமந்தா, சிறப்பாக நடித்திருக்கிறார். இது முழுக்க முழுக்க அவருடைய படம்தான். அவர் சண்டையிடும் காட்சிகளிலும் பஞ்ச் வசனங்களைப் பேசும்போது திரையரங்குகளில் விசில் பறக்கிறது.

வரலட்சுமியும் உன்னி முகுந்தனும்கூட சிறப்பாக நடித்திருக்கிறார்கள். வழக்கமான மசாலா அல்லது காதல் கதையைக் கொண்ட திரைப்படம் வேண்டாமென்றால், இந்த வார இறுதியில் யசோதாவைப் பார்க்கலாம். த்ரில்லர் ரசிகர்களாகவோ சமந்தாவின் ரசிகர்களாகவோ இருந்தால் கண்டிப்பாக பார்க்கலாம்” என்கிறது டைம்ஸ் ஆஃப் இந்தியா.

ஒற்றைப் பரிமாணமுள்ள சில பாத்திரப்படைப்புகளைத் தவிர்த்துவிட்டு, சில பதிலில்லாத இடைவெளிகளை நீக்கியிருந்தால் இன்னும் சிறப்பான த்ரில்லராக வந்திருக்கும் என்கிறது தி இந்து நாளிதழின் விமர்சனம்.

“உண்மைச் சம்பவத்தின் அடிப்படையில் உருவாக்கப்பட்ட இந்தப் படத்தில் வாடகைத் தாய் என்பது முழுப் படத்தின் ஒரு அம்சம்தான். இன்னும் சிறப்பாக வந்திருக்கலாம் என்றாலும் கூட, புதிதாக எதையோ செய்ய முயன்ற வகையில் சுவாரஸ்யமான திரைப்படம்தான் இது.

ஏகப்பட்ட க்ளூக்களுடன் கதையை நகர்த்திச் செல்கிறார் இயக்குநர். இவையெல்லாம் முதலில் சாதாரணமாகத் தெரிந்தாலும் ஒரு த்ரில்லருக்கே உரித்தான பெரிய சித்திரத்தை உருவாக்க இவை உதவுகின்றன.

உதாரணமாக, கண்ணாடியில் தனது ஸ்டிக்கர் பொட்டை யசோதா ஒட்டிவைத்துக்கொண்டே இருக்கும் காட்சி. அதை மிகச் சிறப்பாக படத்தில் பயன்படுத்தியிருக்கிறார்கள்.

யசோதா புலனாய்வைத் துவங்கியவுடன் படம் முழுவீச்சில் நகர்கிறது. ஒரு ஆக்ஷன் த்ரில்லராக படம் மாறுவது இயல்பாக நடக்கிறது.

தனது காணாமல் போன நண்பர்களைப் பற்றி யசோதா என்ன கண்டுபிடிக்கப் போகிறார் என்பதை யூகிப்பது கடினமல்ல.

ஆனால், அந்தக் காட்சி வரும்போது அதனைப் பார்ப்பது மிகுந்த தொந்தரவைத் தருகிறது. வாடகைத் தாயாக இருப்பவர்கள் தாங்கள் சுமக்கும் குழந்தை மீது பாசத்தை வளர்த்துக்கொள்ள முடியுமா என்ற கேள்விக்குப் பதில் சொல்ல முயல்கிறது கதை.

ஆனால், வாடகைத் தாய் விவகாரம் என்பது இந்த படத்தின் ஒரு பகுதிதான்.

முக்கியமான அறிவியல் புனைவு படத்தின் பிற்பகுதியில் வருகிறது. ஒற்றைப் பரிமாணமுள்ள சில பாத்திரப்படைப்புகளைத் தவிர்த்து விட்டு, சில பதிலில்லாத இடைவெளிகளை நீக்கியிருந்தால் இன்னும் சிறப்பான த்ரில்லராக வந்திருக்கும்.

இருந்தபோதும் ஒரு சுவாரஸ்யமான த்ரில்லர்தான்” என்கிறது தி இந்து நாளிதழின் விமர்சனம்.

ஒருவருக்கொருவர் புரிந்து வைத்துக் கொள்வதாக நம்பும் காதலனும் காதலியும் தங்களது செல்போனை சில நாள்களுக்கு மாற்றிக் கொண்டால் என்னவாகும் என்பதுதான் படத்தின் கதை. இந்தக் கதைச் சுருக்கும் படத்தில் டிரெய்லரிலேயே வெளிப்படுத்தப்பட்டிருந்தது.

ஆனால் இந்தக் கதை தன்னுடைய பாடலில் இடம்பெற்றிருந்தது என்று கவிஞர் அறிவுமதி கூறியிருந்ததால் சர்ச்சை எழுந்த நிலையில் இந்தப் படம் வெளிவந்திருக்கிறது.

கத்தியின் மீது நடப்பது போன்று, அடி சறுக்கினால் வீழ்ச்சிதான் என்று தோன்றும் இந்தக் கதையைக் கொண்டு எடுக்கப்பட்டிருக்கும் இந்தப் படம் பெரும்பாலும் இன்றைய தலைமுறை இளைஞர்களுக்கானது என்று பல ஊடகங்கள் கூறுகின்றன.

படத்தின் முதல்பாதி முழுக்க பார்வையாளர்களை வயிறு குலுங்க சிரிக்க வைத்திருக்கிறார்கள் என்கிறது தினமணியின் விமர்சனம். “சத்யராஜ், பிரதீப் சந்திக்கும் முதல் காட்சியில் விசில் பறக்கிறது. இரண்டாம் பாதியிலும் பல இடங்களில் நகைச்சுவைக் காட்சிகள் பலமாக கைதட்ட வைக்கின்றன” என்று தினமணி கூறுகிறது.

படத்தின் இரண்டாம் பாதி, ஆபாசமான சொற்கள் மற்றும் நீளம் குறித்து ஊடகங்கள் விமர்சித்திருக்கின்றன.

அதே நேரத்தில் “படத்தின் நீளம் அதிகமாக இருந்தாலும் அதைப் பற்றி யோசிக்க நேரம் கொடுக்காமல் சிரிக்க வைத்தே படக்குழுவினர் வெற்றி பெற்றுள்ளனர்” என்று தினமணி பாராட்டியிருக்கிறது.

“சில காமெடிகள் கதையோட்டத்திற்கு கைகொடுக்கின்றன. பலவும் ஆபாச வார்த்தைகளாகவும், முகம் சுளிக்க வைக்கும் வகையிலும் இருப்பதை ரசிக்க முடியவில்லை. இன்ஸ்டாகிராம், டின்டர் போன்ற நவீன யுவ, யுவதிகள் புழங்கும் தளங்களில் நிகழும் அத்துமீறல்கள் சில இடங்களில் காமெடியாகவும், சில இடங்களில் அயற்சி தரும் விதத்திலும் விவரிக்கப்பட்டுள்ளன. ” என்று இந்து தமிழ் கூறியிருக்கிறது.

படத்தின் திரைக்கதையை இந்து தமிழ் பாராட்டியிருக்கிறது.

“நாயகன்-நாயகி ஆகியோரின் காதலை மட்டும் விவரிக்காமல், அதனையொட்டி பயணிக்கும் ரவீனா – யோகிபாபு ஆகியோரின் கதை திரைக்கதையை சுவாரஸ்யப்படுத்த உதவுகிறது” என்று இந்து தமிழ் கூறுகிறது. டைம்ஸ் ஆப் இந்தியாவும் இதேபோன்ற ஒரு கருத்தைக் கூறியிருக்கிறது.

எனினும் சில காட்சிகளைக் குறிப்பிட்டு லாஜிக் இல்லை என்று குறைபட்டிருக்கிறது இந்து தமிழ்.

இயக்குநரின் நடிப்பு எப்படி?

கோமாளி படத்தில் கேமியோவாக வந்துவிட்டுப் போன பிரதீப் ரங்கநாதன் இந்தப்படத்தில் நாயகனாக நடித்திருக்கிறார். இந்து தமிழ், டைம்ஸ் ஆப் இந்தியா, தினமணி போன்ற பெரும்பாலான ஊடகங்கள் அவரது நடிப்பைப் பாராட்டியிருக்கின்றன.

கூடவே, “சில இடங்களில் ஓவர் ஆக்டிங் எட்டிப் பார்க்கிறது” என இந்து தமிழும், “உணர்ச்சிப் பூர்வமான காட்சிகளின் இன்னும் சிறப்பாக நடிக்க வேண்டும்” என டைம்ஸ் ஆப் இந்தியாவும் சுட்டிக் காட்டியிருக்கின்றன.

நாயகி இவானா, சத்யராஜ், ராதிகா, யோகி பாபு ஆகியோரின் பாத்திரங்கள், அவர்களின் நடிப்பு ஆகியவையும் பரவலாகப் பாராட்டுப் பெற்றிருக்கின்றன.

“ரகசியங்களை தெரிந்துகொள்ளும் ஆர்வம், இங்கு யாரையும் நம்ப முடியவில்லை என அழும் இடங்களில் இயக்குநர் பிரதீப் ரங்கநாதன் சிறப்பான நடிப்பை வெளிப்படுத்தியுள்ளார். அறிமுகமான முதல்படம் என்றாலும் நாயகனாக பல இடங்களில் தேறியிருக்கிறார். நாயகியான இவானா நடிப்பு தத்ரூபமாக காட்சிபடுத்தப்பட்டதைப் போன்ற உணர்வு ஏற்படுகிறது” என்கிறது இந்து தமிழ்.

இசை எப்படி இருக்கிறது?

படத்துக்கு யுவன் சங்கர் ராஜா இசையமைத்திருக்கிறது. “படத்தை கிளைமேக்ஸை நோக்கி தாங்கிச் செல்வதற்கு இசை உதவியிருக்கிறது” என்று டைம்ஸ் ஆப் இந்தியா கூறுகிறது.

“காட்சிகளுக்கான உணர்வுகளை கட்டியெழுப்பியதில் யுவன் சங்கர் ராஜாவுக்கான பங்கு அளப்பரியது. 90’ஸ் மட்டுமல்ல 2கே கிட்ஸ்களுக்குமான இசையமைப்பாளர் தான், என்பதை உணர்த்தும் வகையில் பின்னணி இசையில் பலம் சேர்த்திருக்கிறார்.” என்று கூறுகிறது இந்து தமிழ்.

பின்னணி இசையும் இரண்டு பாடல் காட்சிகளும் ரசிக்க வைப்பதாக தினமணி கூறுகிறது.

கன்னடத்தில் வெளிவந்து பெரும் வெற்றியைப் பெற்றிருக்கும் ‘காந்தாரா’ திரைப்படம், இந்த வாரம் முதல் தமிழ், இந்தி, தெலுங்கு, மலையாளம் ஆகிய மொழிகளிலும் டப் செய்யப்பட்டு அக்டோபர்16இல் வெளியாகிறது. கடந்த சில ஆண்டுகளில் ‘கவலுதாரி’, ‘கருட கமனா க்ருஷப வாகனா’ என கன்னட திரையுலகிலிருந்து கவனிக்கத்தக்க திரைப்படங்களாகவே வெளிவந்து கொண்டிருக்கும் நிலையில், காந்தாரா இந்தப் போக்கை அடுத்த கட்டத்திற்கு எடுத்துச் சென்றிருக்கிறது. இந்தப் படத்திற்கு ஊடகங்களில் தற்போது விமர்சனங்கள் வெளியாகிவருகின்றன.

முதலில் இந்தப் படத்தின் கதையைப் பார்க்கலாம்: 1847ஆம் ஆண்டில் கன்னட பிரதேசத்தில் உள்ள அரசர் நிம்மதியைத் தேடி காட்டுக்குள் செல்கிறார். அங்கு வசிக்கும் மக்கள் இணைந்து கடவுளை வழிபடுவதைப் பார்த்து, அவர்களுக்கு பெரிய அளவில் நிலங்களை எழுதிக் கொடுக்கிறார். இதற்குப் பிறகு 1970களில் அந்த அரசனின் வழிவந்த ஒருவன், அந்த நிலங்களை மீட்க நினைக்கிறான்.

ஆனால், அங்கிருக்கும் தெய்வம் எச்சரிக்க, அவன் இறந்து போகிறான். இதற்குப் பிறகு, 1990ல் பண்ணையார் ஒருவர் அதே நிலத்தை அந்த மக்களிடமிருந்து பறிக்க நினைக்கிறார். மற்றொரு பக்கம், காப்புக் காடுகளை அளந்து மக்களை வெளியேற்றப்போவதாகக் கூறுகிறது வனத்துறை. அந்த மக்கள் வணங்கும் தெய்வம் என்ன செய்தது என்பது படத்தின் மீதிக் கதை.

முக்கோண திரைக்கதை

நில அரசியலை அரசு நிர்வாகம், நிலச்சுவான்தார்கள், பழங்குடியின மக்கள் என முக்கோணத்தில் இணைத்து திரைக்கதை எழுதியிருக்கும் விதம் சுவாரஸ்யத்திற்கு பெரிதும் கைகொடுத்திருப்பதாகச் சொல்கிறது இந்து தமிழ் திசையின் விமர்சனம்.

“முதல் பாதியில் ‘கம்பளா’ எனப்படும் எருமை மாட்டு போட்டி, அதையொட்டி சேற்றில் நடக்கும் சண்டைக்காட்சிகள் என காட்சி விருந்தாக பார்வையாளர்களை கவருகிறது படம். மற்றொருபுறம் யதார்த்ததுக்கு நெருக்கமான வாழ்விடங்கள், பழங்குடியின மக்களின் பண்பாட்டு கலாசாரம், வேட்டை தொழில் உள்ளிட்டவை கவனம் பெறுகின்றன. இறுதிக் காட்சியை மக்களின் நிலவியல் தன்மை சார்ந்து பதிவு செய்த விதம் ரசிக்க வைக்கிறது.

ரிஷப் ஷெட்டியின் நடிப்பு படத்திற்கு உயிரோட்டம் கொடுத்து காட்சிகளை மெருகேற்றுகிறது. குறிப்பாக இறுதிக் காட்சியில் அவர் ஆடும் ஆட்டமும், அதனுடன் சேர்ந்த நடிப்பும் தேர்ந்த கலைஞனுக்கான உருவகம். கறாரான வனத்துறை அதிகாரியாக கிஷோர். நாயகனுடன் முறுக்கிக் கொண்டு நிற்பது, தனது பணிக்கு இடையூறு ஏற்படும்போது திமிருவது என முதல் பாதியில் ஒருவகையான கதாபாத்திரமாகவும், இரண்டாம் பாதியில் அதற்கு முற்றிலும் மாற்றாகவும் தனக்கான கதாபாத்திரத்தை செவ்வனே செய்திருக்கிறார்.

படத்தின் மற்றொரு பெரிய பலம் அதன் தொழில்நுட்பக்குழு. வரைகலை, இசைக் கோர்வை, கலை ஆக்கம், சண்டைப்பயிற்சி, ஒலி வடிவமைப்பு உள்ளிட்டவை சிறந்த காட்சியனுபவத்திற்கு பக்கபலம் சேர்க்கின்றன. இடைவேளைக்கு முன்பான சண்டைக்காட்சிகளும், கம்பளா போட்டியும், இறுதிக்காட்சியில் திரையில் தெறிக்கும் வண்ணக்கலவையும் அரவிந்த் காஷ்யம் ஒளிப்பதிவில் அழகூட்டுகின்றன. தவறாமல் திரையரங்குகளில் கண்டு ரசிக்கத்தக்க சமகால படைப்பு இது” என்கிறது இந்து தமிழ் திசை.

கடைசி 20 நிமிடங்கள்

படத்தின் கடைசி 20 நிமிடங்களில் ரிஷப் ஷெட்டியின் நடிப்பு சில்லிட வைக்கிறது என்கிறது டைம்ஸ் ஆஃப் இந்தியாவின் விமர்சனம்.

“படத்தின் கதை ஊகிக்கக்கூடியதாக இருந்தாலும், சிறப்பான தொழில்நுட்பம் இதனை ஒரு தனித்துவம் மிக்க அனுபவமாக்குகிறது. காந்தாராவைப் பொறுத்தவரை இது முழுக்க முழுக்க ரிஷப் ஷெட்டியின் ஆட்டம்தான். படத்தின் இயக்குநராகவும் கதாநாயகனாகவும் மிளிர்கிறார் அவர். இந்தப் படத்தின் ஒளிப்பதிவு உங்களை உள்ளே ஈர்த்து, படத்தின் ஒரு பகுதியாக்கி விடுகிறது. படத்தின் முதல் பகுதி ஒரு விறுவிறுப்பான கதையைக் கொண்டிருக்கிறது.

இரண்டாம் பகுதி, கலாசாரம், பாரம்பரியம், மர்மங்கள் என தீவிரமான பாதையில் பயணிக்கிறது. இந்தப் படத்தின் உச்சகட்ட காட்சியையும் அதற்கு முந்தைய காட்சிகளையும் மறக்கவே முடியாது. மிகச் சிறப்பாக யோசித்து, அந்தக் காட்சிகளை சிறப்பாகவும் படமாக்கியிருக்கிறார்கள். கடைசி 20 நிமிடங்களில் ரிஷப் ஷெட்டியின் நடிப்பு சில்லிட வைக்கிறது. அவர் கடலோர பகுதியைச் சேர்ந்தவர் என்பதால், அப்பகுதி மக்களுக்கே உரிய உடல்மொழி மிக இயல்பாக அவருக்கு வருகிறது. ஒரு நடிகன் என்ற முறையில் ரிஷப் ஷெட்டியின் ஒரு மறைக்கப்பட்ட பகுதியைக் காட்டுகிறது இந்தப் படம்.

“காட்சி ரீதியாக இந்தப் படம் பிரமாண்டமானது. ஒளியமைப்பு, காட்சிப்படுத்தல் என மிகச் சிறப்பாக பணியாற்றியிருக்கிறார் ஒளிப்பதிவாளர் அரவிந்த் காஷ்யப். நாட்டுப்புற கதையிலிருந்து உருவாக்கப்பட்டிருக்கும் இந்தக் கதையை படமாக்குவதில் மிகுந்த சிரத்தை எடுத்திருக்கிறார்கள். துளு நாட்டின் கலாசாரத்தை எவ்வித சமரசமும் இன்றி வெளிப்படுத்தியிருக்கிறார்கள்” என்கிறது டைம்ஸ் ஆஃப் இந்தியாவின் விமர்சனம்.

வனத்தை முன்வைத்து அரசு அதிகாரிகளுக்கும் மக்களுக்கும் இடையில் ஏற்படும் மோதல், ஜாதி ஏற்றத்தாழ்வு, வளர்ச்சி என்ற பெயரில் நடக்கும் நிகழ்வுகளுக்கு மத்தியில் நம்முடைய நிகழ்த்து கலைகளைப் பாதுகாக்க வேண்டியதன் கட்டாயம் என பல்வேறு விஷயங்களை இந்தப் படம் பேசுகிறது என்கிறது இந்தியா டுடேவின் விமர்சனம்.

“மைய நீரோட்டத் திரைப்படங்களுக்கே உரிய நடிப்பை, பாரம்பரியக் கலை வடிவங்களைப் பயன்படுத்தி மேம்படுத்தியிருக்கிறார் ரிஷப் ஷெட்டி. கதையின் நாயகன் சிவாவாக கச்சிதமாகப் பொருந்துகிறார் ரிஷப்.

தொடர்ந்து நிராகரித்து வந்த பொறுப்பை, நேரம் வரும்போது ஏற்கிறான் நாயகன். வேட்டையாடுவது, மரம் வெட்டுவது, பெண்களைத் துரத்துவது என திரியும் சிவா, அல்லு அர்ஜுனின் புஷ்பாவைப் போல வழக்கமான நாயகனில்லை. ஆனால், தாம் ஏற்று நடித்திருக்கும் பாத்திரத்திற்கு முழுமையாக ஒப்புக் கொடுத்திருக்கிறார் ரிஷப்.

ஆனால், காந்தாராவைப் பார்க்க இதுமட்டுமே காரணமல்ல. வனத்தை முன்வைத்து அரசு அதிகாரிகளுக்கும் மக்களுக்கும் இடையில் ஏற்படும் மோதல், ஜாதி ஏற்றத்தாழ்வு, வளர்ச்சி என்ற பெயரில் நடக்கும் நிகழ்வுகளுக்கு மத்தியில் நம்முடைய நிகழ்த்துக் கலைகளைப் பாதுகாக்க வேண்டியதன் கட்டாயம் என பல்வேறு விஷயங்களை இந்தப் படம் பேசுகிறது.

இது தவிர, அவ்வப்போது வரும் மிகச் சிறப்பான ஆக்ஷன் காட்சிகள், அட்டகாசமான க்ளைமாக்ஸ் ஆகியவை சேர்ந்து இந்தப் படத்தை திரையரங்கில் பார்க்கும் கட்டாயத்தை ஏற்படுத்துகின்றன. ஆனால், இந்தப் படத்தில் எல்லாம் துல்லியமாக இருப்பதாகச் சொல்ல முடியாது. குறிப்பாக பெண்கள் மிகப் பிற்போக்குத்தனமாக நடத்தப்படுகிறார்கள். மற்றபடி குறிப்பிடத்தக்க படம்” என்கிறது இந்தியா டுடே.

கல்கி எழுதிய பொன்னியின் செல்வன் நாவல், மணிரத்னத்தின் இயக்கத்தில் திரைப்படம் ஆகியிருக்கிறது. இந்த முதல் பாகத்தில், நாவலில் இருந்து எந்த அளவுக்குப் படம் விலகியிருக்கிறது?

மணிரத்னம் இயக்கத்தில் பொன்னியின் செல்வன் நாவல் தற்போது திரைப்படமாக வெளியாகியுள்ளது. மொத்தம் இரண்டு பாகங்களாக இந்த படம் வெளியாகிவிருக்கும் நிலையில், முதல் பாகம் தற்போது வெளியாகியுள்ளது.

‘பொன்னியின் செல்வன்’ நாவல் மொத்தம் ஐந்து பாகங்களைக் கொண்டது. அதில் வந்தியத்தேவனும் அருள்மொழிவர்மனும் கடலில் மூழ்குவது இரண்டாம் பாகத்தின் இறுதியில் நடக்கிறது. தற்போது வெளியாகியிருக்கும் திரைப்படம் அந்தக் காட்சியோடு முடிவுக்கு வந்திருக்கிறது. மீதமுள்ள மூன்று பாகங்களின் கதை அடுத்த ஆண்டு வெளியாகவிருக்கும் பொன்னியின் செல்வன் – 2ல் இடம்பெறும்.

தற்போது வெளியாகியிருக்கும் திரைப்படத்தில் இந்த முதலிரண்டு பாகங்களில் உள்ள கதை வெகுவாக சுருக்கப்பட்டிருக்கிறது. அதேபோல, சில காட்சிகள் மாற்றப்பட்டும் உள்ளன.

1. கதையின் துவக்கம்: நாவலில் கதையானது, வந்தியத்தேவன் ஆதித்த கரிகாலனின் ஓலையோடு வீராணம் ஏரிக் கரை மீது பயணம் செய்வதாகத் துவங்கும். திரைப்படத்தில் ராஷ்டகூடர்களுடனான போருடன் துவங்குகிறது. ஓலைக்குப் பதிலாக தனது வாளைக் கொடுத்து வந்தியத்தவேனை அனுப்புகிறான் ஆதித்த கரிகாலன்.

2. கடம்பூர் மாளிகைச் சதி: நாவலைப் பொறுத்தவரை, வந்தியத்தேவன் தஞ்சாவூருக்குச் செல்லும் வழியில் தனது நண்பன் கந்தமாறனின் மாளிகையில் தங்கும்போது எதேச்சையாக ஆதித்த கரிகாலனுக்கு எதிராக பெரிய பழுவேட்டரையர் செய்யும் சதி தெரிய வருகிறது. ஆனால், திரைப்படத்தில் ஆதித்த கரிகாலனே கடம்பூரில் சதி நடக்கவிருப்பதாகக் கூறுகிறான்.

3. குடந்தை ஜோதிடர்: பொன்னியின் செல்வன் நாவலில் ஒரு முக்கியமான பாத்திரம் குடந்தை ஜோதிடர். இவரிடம் அரச குடும்பத்தைச் சேர்ந்த அனைவரின் ஜாதகமும் இருக்கும். இந்த ஜோதிடரின் இல்லத்தில்தான் குந்தவையும் வந்தியத்தேவனும் பார்ப்பார்கள். ஆனால், திரைப்படத்தில் இந்தப் பாத்திரம் வரவேயில்லை. திரைப்படத்தில் குந்தவைக்கும் வந்தியத்தேவனும் இடையிலான முதல் சந்திப்பு பழையாறையில் நடக்கிறது.

4.முத்திரை மோதிரம்: நாவலில் நந்தினியிடமிருந்து முத்திரை மோதிரத்தைப் பெறும் வந்தியத்தேவன், தஞ்சாவூர் கோட்டைக்குள் மரியாதையாக உள்ளே அனுமதிக்கப்படுவான். ஆனால், திரைப்படத்தில் முத்திரை மோதிரத்தைக் காட்டியும் வீரர்கள் அவனைக் கட்டிப்போட்டுவிடுகிறார்கள்.

5. சுரங்கப் பாதையில் கந்தமாறன் மீது கொலை முயற்சி: நாவலைப் பொறுத்தவரை நந்தினியின் அரண்மனையிலிருந்து அவனாகத்தான் சுரங்கப்பாதையைக் கண்டுபிடித்து தப்புவான். சுரங்கப் பாதைக்குள் சென்ற பிறகு, அந்த சுரங்கப் பாதையில் வைத்து சம்புவரையரின் மகனான கந்தமாறன் முதுகில் குத்தப்படுவதைப் பார்த்து, அவனைக் காப்பாற்றுவான். அந்தப் பழி வந்தியத்தேவன் மீதே விழும். ஆனால், திரைப்படத்தில் நந்தினியே அவரை சுரங்கப்பாதையில் அனுப்பிவைக்கிறாள். கந்தமாறன் மீதான தாக்குதல் சம்பவம் படத்தில் இல்லை.

6. பூங்குழலி அறிமுகம்: நாவலில் பூங்குழலியை வந்தியத்தேவன் கோடிக்கரையில் சந்திப்பான். அவளிடம் பேசி வலியுறுத்தி, அவளுடைய படகில் தன்னை இலங்கைக்கு அழைத்துச் செல்லுமாறு கூறுவான். அப்படித்தான் இருவரும் அறிமுகமாவார்கள். திரைப்படத்தில், திடீரென பூங்குழலி பாத்திரம் அறிமுகமாகிறது. எப்படி இருவரும் சந்தித்தார்கள் என்பது இல்லை.

7. சிற்றரசர்களுடன் குந்தவை சந்திப்பு: பழுவேட்டரையரின் மாளிகையில் சிற்றரசர்களைச் சந்திக்கும் குந்தவை, அவர்களைச் சஞ்சலப்படுத்துவதற்காக, தன் சகோதரர்களுக்கு விரைவில் திருமணம் செய்து வைக்கவிருப்பதாகக் கூறுவாள். தங்கள் வீட்டுப் பெண்ணை இளவசர்களுக்குக் கொடுக்கலாமே என்று எண்ணி சிற்றரசர்கள் யோசிப்பார்கள். இப்படி ஒரு காட்சி திரைப்படத்தில் வருகிறது. ஆனால், நாவலில் அப்படியான தருணம் ஏதும் கிடையாது.

8. அருள்மொழிவர்மனைக் காப்பாற்றுவது யார்?: நாவலில் இலங்கையிலிருந்து புறப்படும்போது ஒரு கப்பலில் ஏறி, அந்தக் கப்பல் தீப்பிடித்து விட, வந்தியத்தேவனும் அருள்மொழிவர்மனும் கடலில் மிதப்பார்கள். அப்போது அங்கு வரும் பூங்குழலி அவர்களைக் காப்பாற்றுவாள். திரைப்படத்தில் இதுதான் உச்சகட்ட காட்சியாக வைக்கப்பட்டிருக்கிறது. ஆனால், வாய் பேச முடியாத, நந்தினியின் சாயலில் உள்ள மந்தாகினிதேவியே இவர்களைக் காப்பாற்ற முயல்வதாக காட்டப்படுகிறது.

9. பழையாறை: நாவலில் குந்தவை பழையாறையில் வசிக்கிறாள். பழையாறை என்பது அரசிலாறு, முடிகொண்டான் ஆறுகளுக்கு இடையில் உள்ள ஒரு சிறு நகரம். ஆனால், திரைப்படத்தில் ஒரு பிரமாண்டமான ஆற்றின் கரையில் உள்ள பகுதியாக இது காட்டப்படுகிறது. அதேபோல, இலங்கையும் கடற்கரையை ஒட்டி பிரமாண்டமான மலைகளை உடைய பகுதியாகக் காட்டப்படுகிறது. ஆனால், நாவலில் வரும் யானையிறவு, தொண்டைமானாற்று முகத்துவாரம் போன்றவை, தமிழக கடலோரப் பகுதிகளைப் போன்றவை.